Mosikad na karong adlawa ang gipaabot nga Barangay Bago, Asturias Invitational Basketball Tournament diha sa Bago Sports and Cultural Complex.
Gitug-an ni konsehal Carmel Mondreza nga adunay unom ka teams ang magtige sa korona ug kini mao ang Tuburan Dribblers, Colonia Stars, Arpili Residences, Knights Café, ASA Cagers ug Langub Little Giants.
Ang koponan moduwa og single round robin format diin ang nag-unang upat ka teams moabante sa semifinal rounds ug ang top two teams moduwa og "best-of-three" finals. Ang mangaparot magtinaktakay alang sa ikatulong dapit.
Atol sa finals, ang mga koponan mahimong mopuno og tulo ka commercial players aron pagpalig-on sa ilang koponan.
Ang makampiyon sa maong torneyo mobulsa og P20,000 ganting salapi ug tropeyo. ang ikaduhang dapit makadawat og P15,000, ang mopahiluna sa ikatulo nga dapit makaangkon og P10,000 ug motungtong sa ikaupat gantihan og P5,000.
Human sa opening ceremonies, mosunod dayon ang kumbati sa upat ka koponan. Ang Colonia moharong sa Knights Café alang sa pasiunang duwa, samtang ang Arpili Residences makigsambunot sa Langub Little Giants sa main game.