Nangandam na karon ang mga Sugbuanong riders alang sa laing hagit gikan sa mountainbikers lukop nasud lakip na ang mga sakop sa national mountainbiking team nga nagbansay karon sa Danao dihang ang 9th National Sandurot Mountainbike Race mosikad karong Nobiyembre 17 didto sa dakbayan sa Dumaguete.
Ang maong kompetisyo naglatid og duha ka mountainbike events -- ang cross-country ug ang downhill.
Ang mountainbikers nga mosambunot sa cross-country bahinon sa 10 ka kategoriya nga mao ang open expert, sport, masters, veterans, juniors, beginners, women, fatboys, golden boys ug kids.
Hinuon adunay age limit ang lime sa napu ka kategoriya. Ang masters class alang niadtong riders nga nag-edad og 35-40 anyos, ang veteran division alang niadtong nag-edad og 25-34 anyos, ang junior class alang sa 24-anyos paubos, ang golden boys niadtong riders nga misangko na sa 50-anyos ug pataas ug ang kids division alang niadtong mga bata nga nagpangedaron og 14-anyos ug paubos.
Walay age limit ang fatboys apan ang mga partisipante kinahanglan nga anaay minimum waistline measurement nga labing menos 36 inches.
Sa laing bahin, ang downhill competition, adunay upat ka dibisyon -- open expert, intermediate, hardtail ug ang execuive class.
Ang tanag dibisyon sa downhill event wala limit sa edad gawas lang sa executive class nga ang mga riders nag-edad og 35 anyos ug pataas.
Ganting salapi ug tropeyo ang nagpaabot sa mga mananaog ning maong kompetisyon.