Artkyob Monday Group andam na modepensa

Ang Artkyob Monday Group andam na nga manalipod sa ilang korona sa Visayan Gym Regulars Basketball Tournament nga mosikad karong Nobiyembre 18 didto sa Visayan Glass Gym sa Guadalupe, ning siyudad.

Gilauman ni  coach Sidney Kiamko sa  Artkyob Monday Group nga makasugat  kini og mga hagit gikan sa mga lig-ong koponan sama sa Tuesday Dentistry  Group ni nilang Gunther Seroy ug Clint Bacalla ug Wednesday Group Ballers nga gibitoonan nilang Senen Maturillas, Dax Navarro ug Robert Chua.

Lain pang teams nga mosalmot sa maong kompetisyon mao ang Thursday Group ni Cris Chua, Architects Thursday Group nga gipangulohan ni Ian Osmeña, Friday Group ni Edgar Daddy, Daks Kakanin Corner ug SCH Marketing-CBR Dawgz.

Gidapit sab sa mga tigpasiugda organizers ang Alano and Sons Inc., University of San Carlos Batch 2004, Lite Shipping Corporation, Southwestern Group, 40 Aces, Moondogs ug Badhas Boyz sa pagsalmot sa maong torneyo nga adunay registration fee nga P4,000  matag team.

Gawas sa mga tropeyo, ang makampiyon ning maong torneyo  mobulsa og P6,000, ang first runner up modawat og  P5,000, ang second runner-up makadawat og P4,000.