SME, San Roque pabiling way pilde

Nagpabiling walay pilde ang SME Academy ug San Roque Football Club aron sa pagpangulo sa ilang tagsa-tagsa ka dibisyon sa 1st Futsal for Don Bosco Boys Home Youth Development Tournament didto sa Don Bosco College gym.

Nag-una na karon ang SME Academy sa bracket B sa men's division bitbit ang 3-0 win-loss record.

Ang San Roque Football Club nga adunay 4-0 win-loss nga baraha, mao usab ang nag-una sa women's division.

Gilangkat sa SME ang ilang ikatulong  daog pinaagi sa pagpukan sa UP Alumni, 7-2.

Sa laing duwa, ang House of Hope mipaluhod sa UP Alumni, 10-2 aron pagtungtong sa ikaduhang dapit bitbit ang 2-1 nga baraha.

Sa Bracket A, ang DBBH-A ug ang San Roque Royale United Football Club (SRRUFC) nagyayong sa liderato nga pulos mihipos  og  2-0  win-loss record.

Sa laing bahin, ang DBBH-A miposte sa ilang ikaduhang kadaugan human nila sirohi ang Don Bosco College, 5-0.

Ang San Roque Football Club (SRFC) mihipos sab og daog sa duha ka sunod-sunod nga duwa sa women's division.

Ang SRFC milansang sa ilang unang daog batok sa CSCST, 5-2 ug nasundan kini sa ilang duwa batok sa Don Bosco, 4-0.