Human sa kadaugan ni Manny Pacquiao sa iyang rematch ni Marco Antonio Barrera pinaagi sa 12-round unanimous decision, ang walay pildeng super featherweight stars nga sila si Joan Guzman (27-0, 17KOs) sa Dominican Republic ug Edwin Valero sa Venezuela mipadayag sa interes nga maoy sunod mohagit
sa Filipino sports hero.
“When are you going to fight me,” ni Guzman, kinsa nagpunay’g singgit ni Pacquiao atol sa post-fight conference.
Sa Guzman nakapaluhod na og 17 ka boxers sa 27 niya ka away.
Sa laing bahin, ang Japan-based nga si Valero, kinsa nakasugat na og 22 ka away ug sa tanan niyang daog pinaagi sa knockout, misaysay nga buot ug andam siyang moharong ni Pacquiao bisa’g unsang orasa ug bisan asang dapita.
“Yes, it is now or never. I am ready for Pacquiao, I want Pacquiao. I respect him as a fighter and all that he has done. But, he has never faced anyone like me; a left-handed fighter who is just as fast and strong. I am willing to fight him anywhere in the world and at anytime,” matud pa sa reigning WBA 130-pound crown-holder.
Hinuon, ang nag-unang contender nga mohagit sunod ni Pacquiao mao si World Boxing Council (WBC) super featherweight Juan Manuel Marquez. Kini gumikan kay daghan ang naghinam-hinam ug nagpaabot sa Pacquiao-Marquez rematch.
Si Marquez lig-on ug isog, gani nakalahutay pa kini human matumba sa makatulo ka higayon sud lang sa unang hugna aron pagpuwersa ngadto sa panagtabla ni Pacquiao atol sa ilang unang engkuwentro niadtong 2004.
Angayan una atimanon nilang Guzman, Valero ug Marquez ang ilang umaabot nga mga away usa pa kini maghuna-huna sa pakigsangka ni Pacquiao.
Si Guzman gitakdang moharong ni Humberto Soto karong Nobiyembre 17 didto sa Borgata Hotel Casino sa Atlantic City, New Jersey, si Valero nangandam na sa iyang away batok ni Fernando Trejo karong Disyembre 15 didto sa Plaza de Toros sa Cancun, Quintana Roo sa Mexico, samtang si Marquez moharong ni Rocky Juarez karong Nobiyembre 3 didto sa Desert Diamond Casino sa Tucson, Arizona.
Ang moposte og impresibong kadaugan maoy makaangkon og katungod sa pakigsangka ni Pacquiao, kinsa gikatakdang moaway unya sa bulan sa Pebrero o Marso sunod tuig didto sa Macau o dili ba sa Vancouver, Canada.