Nagsugod na ang Pool Showdown sa ABC-5. Taas-taas pa kining maong serye sa torneyo kay molungtad man kini'g pipila ka bulan. Misalmot sa maong serye sa mga torneyo ang inilang mga bilyarista sa atong nasud sama nila ni Marlon Manalo, Antonio Gabica, Warren Kiamco, Bernard Marbella, Ricky Zerna, Renemar David, Ronato Alcano, Edgar Acaba, Lee Van Corteza, Jeffrey de Luna ug daghan pang uban.
Tan-awa ninyo kining maong serye sa torneyo sa ABC television channel matag Martes ug Sabado sa gabii aron kamo malingaw. Sa matag hugna sa dula, makasapi gayod ang magdudula nga magpakita'g maayong performance. Dolyar pa ang ilang kitaon sa maong torneyo. Mao nga... tan-aw na!
* * *
May nakahunghong nako nga daghan diay ang nagsubay niining atong lindog diha sa Nueva Fuerza, Carmen, Bohol. Ubay-ubay sab diay ang atong mga ka-berks diha nga mahiligon sa pagdula og bilyar. May bilyaran sab sa maong dapit diin didto nila gibaid ang ilang abilidad. Hinaot nga magpadayon sila pagbansay ug pagbakyaw sa ilang tako.
* * *
Usa sa angay likayan sa magdudula panahon sa iyang pagdula mao ang paghimo og foul. Dili gyud angay mohimo og unnecessary foul ang usa ka bilyarista kay ang paghimo sa ingon makapagamay sa kahigayonan nga siya magmadaogon.
Usahay gikinahanglan ang paghimo'g foul aron makuha ang game plan nga gihan-ay nang daan sa magdudula. Apan dili sa tanang higayon nga epektibo kini. Ang mga eksperto nag-awhag nga kutob sa mahimo, likayan gayod ang foul.
Laing angay bantayan sa magdudula mao ang shot clock. Dunay mga torneyo sa bilyar diin estriktong gipatuman ang mahitungod sa shot clock kay makaapekto usab kini sa katibuk-ang resulta sa iyang pagdula. Ang pagtuman kanunay sa mga lagda sa dula maoy labing desenteng performance sa usa ka magdudula.
* * *
(Mga sugyot ug pakisayod? Text sa 0910-8105522)