Pito ka Sugbuanon ug laing duha gikan sa Central Visayas ang mogikan karon uban sa RP team nga mokumbati sa duha ka semana nga Special Olympics World Summer Games didto sa Shanghai, China.
Mangulo sa mga atleta sa Sugbu mao sila si Wilfredo Tampus, Marlon Leyson ug Melchor Cadavos sa Zapatera ug sila si Charissa Juarez, Ariel Sheryn Tan, Michelle Dawa ug Candice Rey Sabang sa Mandaue.
Ang laing duha ka atleta nga ibala mao sila si Jesus Pacaldo sa Tagbilaran ug Joel Ramacho sa Dumaguete City.
Ang tanang pambato sa Central Visayas mobanat sa track and field events gawas lang ni Melchor Cadavos, kinsa mon-entra sa powerlifting event.
Naapil ang pambato sa Central Visayas sa nasudnong koponan human sa ilang maayong labok nga gipakita atol sa Special Olympics National Championships sa miaging tuig didto sa Marikina.