Miabot na dinhi sa Sugbu kagahapon ang Meksikanong si Esau Gaona aron iyang harungon si ALA Boxing Gym jewel AJ 'Bazooka' Banal sa supporting main event sa eksplosibong promosyon nga gilangkuban og lima ka nasud ug unom ka title fights karong Domingo diha sa grand ballroom sa Waterfront-Cebu City Hotel and Casino sa barangay Lahug.
Si Gaona makigtige ni Banal alang sa bakanting WBO Youth super flyweight title. Si Gaona nga nagtangag og 10-3 win-loss card uban ang 6KOs, seguradong mag-aginod kini sa iya unyang pakigharong ni Banal nga gawas nga nagsandig sa hometown advantage, nagbitbit sab og makalisang nga 14-0-1 record nga gidayan-dayanan og 11KOs.
Sa main event, lain pang garbo sa ALA Stable nga si Donnie 'The Snakeman' Nietes (23-1-3, 19KOs), nanghinaut nga iyang makab-ot ang dugay nga gipangandoy sa iyang pakigsangka batok sa way pildeng Thai knockout artist nga si Pornsawan Kratingdaenggym (20-0, 15KOs) alang sa bakanting WBO minimumweight title.
Sa kulbahinam nga undercards sa maong multi-million nga promosyon nga gitambayayongan sa SGG Sports Promotions, ALA Boxing Gym ug South Korea’s Boxing Plaza (BP) Entertainment, si Yong Seung Kim sa Korea makighamag ni Darsim Nangala sa Indonesia alang sa WBO interim Intercontinental junior welterweight belt, samtang si Do Seuk Ooh sa Korea makigbinukbukay ni Joey Ricardo sa Indonesia alang sa WBF Asia-Pacific super lightweight title.
Mowadwad sa nahabiling duha ka championship bouts mao sila si ALA Boy Robert Allanic (17-3-0 8KOs), nga makigpinaksitay batok sa Koreano nga si In Suk Sung (8-2-0 3KOs) alang sa WBO Asia-Pacific bantamweight title, ug ang lain pang pambato sa ALA Gym nga si Rocky Fuentes (26-5-2 12KOs), nga manalipod sa iyang Philippine flyweight title batok ni Danilo Lerio (13-1-1 2KOs).
Ang mga tiket sa maong promosyon mapalit sa tag-P2,500 alang sa VIP, P1,500 sa ringside, P750 sa ballroom ug P300 sa balcony. Mapalit kini sa ALA Boxing Gym sa Banilad Town Center ug ingon man sa USA Sports-Ayala ug Island Souvenirs boutiques sa Ayala ug Waterfront Lahug.