Seguradong magsugwak sa bagang duot sa katawhan ang Cebu Coliseum sa gikatakdang Special Fans Day nga ipahigayon human sa rematch tali sa Team Pacman nga gibitoonan ni Manny 'Pacman' Pacquiao ug sa Cebu Sports Media Association (CSMA) karong adlawa sa alas-9:30 sa buntag hangtod sa 12:00 sa udto.
Ang notadong Cebuano promoter nga si Rex 'Wakee' Salud mitaho dinhi sa Banat News nga maoy gusto ni Pacquiao nga ipakita sa publiko ang exhibition game nga libre aron ang iyang mga fans makasaksi sa kahanas sa Gen. Santos fighter nga moduwa sa hardcourt.
"This is Pacquiao's own way of letting his Cebuano fans know how appreciative he is for their warm reception while he is in Cebu training for his rematch with Barrera," matud ni Salud, ang sinaligan ug business partner ni Pacman.
Karon si Pacquiao naa na sa subsob nga pagbansay sa world-class RWS gym alang sa pagpangandam sa gipaabot nga rematch ni Mexican legend Marco Antonio Barrera unya sa Oktubre 6 didto sa Mandalay Bay Hotel and Casino sa Las Vegas, Nevada.
Human sa dulang basketbol mahinangpon si Pacquiao nga magpahulagway uban sa iyang mga fans, autograph signing ug uban pa.
Bisan pa og ang coliseum abli sa tanan, nagpahimangno si Salud nga ang motan-aw sa duwa anha lang sa lower box area. Kinsa kadtong mosupak pahamtangan og silot.
Si Pacquiao mi-iskor og 27 puntos aron sa pagpangulo sa Team Pacman ngadto sa 75-72 nga kadaugan batok sa Cebu Media hoopsters atol sa ilang unang engkuwentro niadtong Domingo diha sa City Sports Club-Cebu (CSCC) gym.
Sa una niyang duwa, si Pacquiao mihipos og 27 puntos sa kadaugan sa Team Pacman sa iskor nga 75-72.
Mobanat sa CSMA team mao sila si Manny Villaruel, Rico Navarro ug Yoyo Abayan sa The Freeman/Banat News, Jun Migallen ug Erwin Lizaran sa Superbalita, Allan Defensor, Jingo Quijano ug John Pages sa SunStar, Calvin Cordova, Jonas Panerio ug Lito Tecson sa Cebu Daily News, Roy Aznar sa RPN-9 ug Dodong Guden sa DyRF Radio Fuerza.