152 teams magtige  sa Mint Sportshop Football Cup

Moabot sa 152 teams ang mag-ilog sa titulo ning tuiga sa Mint Sportshop Football Cup nga gipasiugdahan sa Mizuno karong adlawa nga sugdan  sa alas-7:30 sa buntag hangtod sa alas-10:00 sa gabii diha sa Cebu City Sports Center field.

Mga kategoriya nga tigian mao ang mga Players (P)6, P8, P10, boys and girls 12, boys 14, boys and girls 17, boys and girls 19, ladies and men's open ug 36-above.

Ang Don Bosco Alumni modepensa sa iyang titulo sa men's open class, samtang ang Springdale Das mosuway sab og depensa sa ilang korona sa 36 and above classification.

Mga magduduwa sa Cebu International School (CIS), Springdale, Bright Academy ug San Roque Football Club (SRF C) nagtinguha sab nga mokulit og back-to-back championships sa laing mga kategoriya.

Ning tuiga, ang Tanjay Football Club lang ang bugtong team gawas sa Sugbu ang misalmot. Ang Bacolod, Dumaguete, San Carlos ug Iligan mi-atras sa maong torneyo tungod kay adunay conflict sa iskedyul.

Ang Mint Sportshop maoy exclusive dealer sa mga produkto sa    Mizuno dinhi sa Sugbu. Mamahimong mobisita sa ilang establishment didto sa Banilad Town Center.