ML Jewelers nakatitulo
Ang crucial triple ni Woodrow Enriquez sa katapusang 13 segundos sa duwa maoy nag-aswat sa M. Lhuillier Kwarta Padala-Cebu Jewelers ngadto sa 76-74 nga kadaugan batok sa host-Duterte Agilas-
Sikit ug kulbahinam kaayo ang engkuwentro gikan sa pagsugod ug igo lang milabaw og tres puntos ang Jewelers, 60-57 paghuman sa third quarter. Apan ang Agilas milayog og balik aron pag-ilog sa labaw, 74-72 human sa free throws ni Arturo Atablanco sa nahabiling 33 segundos sa duwa.
Sa maong duwa, si Enriquez mitira og 3-pointers apan ang bola igo lang mi-untol sa rim, apan nasuwertihan ang Jewelers kay ang bola didto padung ni Stephen Padilla, kinsa anaa sa 3-point area.
Sa pagtuo nga motira, ang Davaoeños misikit ni Padilla, apan ang Sugbuanon mihatag sa bola ngadto ni Enriquez, kinsa libre kaayo ug mipasulod sa iyang mahinungdanong itsa aron pag-ilog sa labaw, 75-74.
Ang Agilas aduna pa untay purohan nga moabante og balik apan si Balong Ramos ang gikalisangang outside-bomber nasipyat sa iyang itsa human kini gilisud-lisod og bantay ni Josh Mante. Nakuha ni Padilla ang bola ug dali kining gi-foul sa nahabiling duha ka segundos sa dili pa matapos ang duwa. Si Padilla mipasud og usa sa iyang duha ka free throws.
Si Enriquez mibugha og 15 puntos, apan si Padilla maoy daku'g natampo sa Jewelers sa iyang 26 puntos. Si Jayford Rodriguez miamot og 15 puntos.
Mao kini ang ikaduhang sunod-sunod nga korona nga naangkon sa Jewelers human sa ilang pagdominar sa Talk N' Txt BAP-SBP Mindanao Visayas Basketball Associate (MVBA) Invitational sa miaging buwan diha sa Cebu Coliseum.
- Latest
- Trending
