Ang Kenn Taekwondo Training Center mikabkab og upat ka gold, tulo ka silvers ug tulo sab ka bronze medals sa 2007 Regional Age-Group Taekwondo Championship didto sa Danao City Sports and Civic Center, dakbayan sa Danao.
Walay nagmahay sa 10 ka mga batos ni head instructor Kenneth Toledo kay nakakuha kini og medalya matag usa kanila.
Ang managsuong Leudtke nga sila si Lenard ug Timothy mipukan sa ilang tagsa-tagsa ka kaatbang aron pagkabkab og bulawan sa ilang tagsa-tagsa ka dibisyon.
Si Lenard midaog sa 120-centimeter and below category, samtang ang maguwang nga si Timothy midaog sab sa 144-152 centimeter grade school category.
Sa pikas bahin, ang 8-anyos nga si Karla Mae Plantar, ningbugwal og bulawan human manghawod sa 120 centimeter and below advance category.
Ang ikaupat nga bulawan alang sa KTTC gitunol ni Kevin Ouano, kinsa naghari sa mid-juniors lightweight category.
Sila si Ethan Evales, Carlos Shan ug Gabrielle Darza mitunol og silvers alang sa KTTC. Samtang ang mikandos og bronze mao sila si Kier Ouano, Anthony Slovak ug Christopher Plantar.