Alliance nakalingkawas

Nakalingkawas ang Alliance Software gikan sa kulbahinam nga duwa human nila gipilde ang PS Bank sa iskor nga 59-57 aron pagposte sa ilang ikatulo  nga daog sa pito ka duwa sa 6th Thirsty Hoop Jams Inter-Company Basketball Tourmament didto sa Bright Academy Gym sa barangay Banilad, ning siyudad.

Naglisod ang  Alliance Software sa nag-unang duha ka kuwarter nga miresulta sa ilang pagkalubong og nuybe puntos,  24-33 paghuman sa first half.

Apan misulbong kini sa katapusang duha ka kuwarter diin ilang gilupig sa pinuntosay ang PS Bank, 35-24 aron pag-angkon sa kadaugan.

Si Kharlo Miñoza miposte og 23 puntos, gisundan kini ni Adrin Lim, kinsa mikandos og 14 puntos. Mitampo sab og 11 puntos si Raymund Ridaza alang sa Alliance Software nga miinat sa ilang baraha ngadto sa 3-4.

Sa laing duwa, ang defending champion Sirlitz midaog pinaagi sa forfeiture batok sa Thirsty Juices and Shakes.

Ang Sirlitz nagpabiling nagkupot sa overall lead bitbit ang way lama nga 7-0 win-loss record, samtang ang Thirsty migaling sa ilang ikatulong kaparotan sa lima ka duwa.

MGA ISKOR

Alliance Software (59) - Miñoza 23, Lim 14, Ridaza 11, Abringe 6, Sanchez 3, Soco 2

PS Bank (57) - Rosal 18, J. Escuyos 12, Catabas 7, Raña 7, R. Escuyos 6, Magno 5