Ang Team Liloanon ug Hotel Fortuna-backed University of San Jose-Recoletos (USJ-R) mipakgang sa tagsa-tagsa nila ka mga kontra aron pagdominar sa 1st M. Lhuillier Kwarta Padala Open Indoor Volleyball Tournament nga mitak-op kagahapon sa University of Southern Philippines Foundation (USPF) Gymnasium.
Ang Team Liloanon ni team owner Gerado "Dodong Gamay" Frasco, uyoan ni Liloan mayor-elect Vincent Franco "Duke" Frasco, mipakaging sa ML Cebu Dried Mango Delights-sponsored USJ-R Spiking Jaguars sud sa upat ka sets, 25-18, 25-17, 24-26, 25-20 aron pagsakmit sa men's division title ning torneyo nga gi-organisa ni M. Lhuillier Sports Development Foundation (MLSDF) executive director Eddie Ybañez.
Bisan pa man sa kapildihan sa ilang men's team, nagmaya gihapon nga mipauli ang mga Josenians gumikan ang USJ-R belles ni coach Grace Antigua ug team sponsor Lorenzo "Chao" Sy milampaso sa Hiroshi sud sa tulo ka sets, 25-22, 25-20, 25-12, aron paglangkat sa kampiyonato sa women's division.
Sa duha ka gubat alang sa ikatulong dapit, ang Dewfoam-backed University of San Carlos (USC) mipakgang sa Tinong's Bakery Mandaue selection, 25-12, 21-25, 25-22, 25-15 sa men's division, samtang ang MLSDF All-Stars mibuntog sa Team RTM, 25-21, 25-19, 25-22 sa women's class.