Ang University of San Jose-Recoletos (USJ-R) ni coach Grace Antigua nakaangkon og duha ka tiket sa finals human gipangpukan ang ilang kontra kagahapon sa 1st M. Lhuillier Kwarta Padala Open Indoor Volleyball Tournament diha sa University of San Carlos (USC) North Campus gym.
Ang ML Cebu Dried Mango Delights-backed USJ-R mipukan sa Tinong's Bakery Mandaue Selection sud sa upat ka sets, 22-11, 25-15, 19-25, 25-22. Ilang sangkaon sa men's finals ang Team Liloanon ni Liloan mayor-elect Gerardo 'Dodong Gamay' Frasco, Jr., nga mipalagpot sa kanhi way pildeng Dewfoam-USC sud gihapon sa upat ka sets, 31-29, 25-14, 21-25, 27-25.
Sa women's category, wala sab magpa-alkansi ang Hotel Fortuna/USJ-R nga mi-abante sab sa kampiyonato human gipilde ang MLSDF All-Stars sa kulbahinam nilang engkuwentro nga misangpot ngadto sa lima ka sets, 25-21, 23-25, 25-16, 19-25, 16-14.
Gumikan niini, ang Hotel Fortuna/USJ-R maoy nakaangkon og katungod nga moduwa sa women's finals batok sa Hiroshi, kinsa mipukan sa Team RTM sud sa upat ka sets, 25-22, 25-20, 22-25, 25-14.