Franchisee initiatives help boost 7-Eleven store performance

Impresibo ang pagbangon ni ALA Boy Robert Allanic gikan sa duha ka sunod-sunod nga kapildihan human gibuntog  ang Koreanong si Chang Jae Kwon pinaagi sa 7th round TKO aron pagsakmit sa WBO Asia-Pacific interim bantamweight title sa miaging adlaw didto sa Shin Heung University sa Uijeongbu City, South Korea.

Sigun sa taho sa boxingconfidential.com, ang Koreanong reperi nga si Wan Soo Yuh mipaundang sa away sa nakaon nga 40 segundos sa ikapitong hugna dihang gidabo-dabo og kulata  si Chang.

Nagsugod ang kabangis ni Allanic human siya magisii sa ibabaw nga bahin sa wala niyang kilay. Sukad niadto, walay puas ang iyang pag-ataki ug gikulata og maayo ang Koreano gamit ang nagpungasi nga jabs ug solidong uppercuts.

Sa ikaunom nga hugna, nagkadugo na og maayo ang nawong ni Chang mugna sa mga kumo nga gibuhian ni Allanic.

Pagsugod sa ikapitong hugna, mihasmag  gilayon si Allanic ug iyang gilumsan si Chang sa  nagpungasi niyang mga kumo hinungdan nga naaghat ang reperi paghunong sa away aron dili mameligro ang Koreanong boksidor.

Si Allanic nagbitbit na karon og 16-3 win-loss record uban ang 8KOs, samtang si Chang nadakin-as ngadto sa 14-3 (10KOs).

Si Fernando Otik, ang stablemate ni  Allanic, way suwerte gumikan kay napukan kini sa Koreanong si Hee Jae Jo pinaagi sa manjority decision sa ilang WBO Asia Pacific super featherweight championship bout.