Managlahing panglantaw

Si Pinoy boxing superstar Manny Pacquiao ug iyang adviser nga si Rex ''Wakee'' Salud managlahi og prediksyon kabahin sa resulta unya sa gi-atngan nga away nilang Oscar de la Hoya ug Floyd Mayweather karong Mayo 5 (Mayo 6 dinhi sa RP) didto sa MGM Grand sa Las Vegas, Nevada.

Sa pakighinabi kagahapon sa Banat News, si Pacquiao miingon nga sa iyang panan-aw modaog si de la Hoya pinaagi sa desisyon.

Sukwahi sa panagna ni Pacman, si Salud nagkanayon nga bugtong pamaagi nga modaog si de la Hoya mao ang pagpalukapa ni Mayweather kay kun mahuman ang 12 ka hugna nga engkuwentro, hayan nga si ''Pretty Boy Floyd'' maoy modaog.

Apan wala mouyon si Pacquiao sa panglantaw sa usa sa sinaligan niyang adviser gumikan kay alang kaniya, singko porsiyento ra ang tsansa ni de la Hoya nga matumba niya si Mayweather.

"Sa akong tan-aw si de la Hoya maoy modaog pinaagi sa desisyon. Mas daku man gud siya ug maayo nga counter-puncher.

Apan sa dihang gipangutana kon duna bay igong katakos si de la Hoya pagpalukapa ni Mayweather, si Pacman mitubag, "Seguro mga five percent lang ang tsansa ni de la Hoya ma-knockout si Mayweather gumikan sa ilang mga style.

Nunot niini, si Pacman naglantaw og usa ka sikit ug kulbahinam nga kumbati batok sa duha ka banggiitang mga boksidor.