Arthro, M. Lhuillier nakatilaw na sab og daog

Ang Arthro Kontra Arthritis ug M. Lhuillier Kwarta Padala Jewelers mikulit na sab og managlahing kadaugan sa 2007 Mindanao Visayas Basketball Association (MVBA) First Conference niadtong Martes diha sa Cebu Coliseum.

Ang Arthro ni Jonathan ''Atan'' Guardo ug coach Al Solis nakalingkawas sa nagkayong opensa ni Mark Ababon sa katapusang kuwarter aron pagkulit niini og 77-75 nga kadaugan batok sa Holcim Pryce Pharma-MisOr ni Gov. Oscar Moreno ug coach Bong Abad, 77-75.

Sa pasiunang duwa, ang M. Lhuillier ni Michel Lhuillier ug coach Raul ''Yayoy'' Alcoseba mitakilid human makalabaw og 19 puntos sa ikaduhang kuwarter apan nakabawi kini aron pagbuntog sa Iligan Archangels ni Mayor Lawrence Cruz ug coach Mike Reyes sa iskor nga 76-65.

Si Alex Cainglet mitali og pito sa iyang 17 puntos sa katapusang kuwarter, samtang si Rino Berame midugang og 11 puntos alang sa Arthro nga mikulit sa ikaduha niining sunod-sunod nga daog human mapilde sa ilang unang duwa.

Si Ababon miratsada og 17 sa iyang 28 puntos sa nahabilin nga 10 minutos sa duwa, apan wala siya makahimo og dakung milagro gumikan kay ang MisOr napilde sa ikaduhang sunod-sunod nga higayon ubos ni coach Bong Abad.

Sa laing bahin, si Stephen Padilla maoy nangulo sa M. Lhuillier bitbit ang 16 puntos, apil na niini ang upat niya ka 3-pointers nga nakahatag og 37-18 nga labaw sa Jewelers. Igo lamang nakasikit ang Iligan sa iskor nga 54-55 gumikan kay mi-rally og balik ang Jewelers dayon sa pagkulit sa ikatulo niining sunod-sunod nga kadaugan.