Yap mi-abante sa semis

Si Kim Steven Yap mipukan ni NM Rogelio Enriquez aron pagmartsa ngadto sa semifinals sa 3rd Coleto L. Itaas Open Active Chess Tournament diha sa Bibo Chess Club, ning dakbayan.

Sila si Yap ug Enriquez nagtabla sa iskor, 1-1 human sa duha ka duwa sa quarterfinal round hinungdan nga nagtinaktakay kini.

Gumikan sa iyang kadaugan, si Yap nakig-uban nilang Anthony Makinano, Joel Pacuribot ug Allan Salientes sa semis ning maong torneyo nga gipadagan ni national arbiter Marvin Ruelan nga gipaluyohan nilang NWM Susan Itaas ug Andres Ruaya.

Si Makinano maoy miguwang top seed human giharos niya og daog ang duha ka duwa batok ni Richard Natividad, samtang sila si Pacuribot ug Salientes maoy milabni sa No. 2 ug No. 3 rankings human nila gipilde sila si Randy Ranile ug Venancio Loyola.

Si Yap magsagubang og bug-at nga tahas gumikan kay sunod niyang sangkaon mao man ang top-ranked nga si Makinano, samtang sila si Pacuribot ug Salientes maoy mag-ilog sa laing luna sa final. Ang mga mananaog maoy mag-abot sa kampiyonato, samtang ang mga pildero maoy magsangka alang sa ikatulo nga puwesto.