Karong tuiga, gipaabot nga magpadayon ang kaaktibo sa atong mga Pinoy cue artists sa pagsalga sa international nga mga billiard tournament. Gikatakda nga mosalmot ang veteran campaigner nga sila si Israel Rota ug Ramon Mistica, Jr. uban ang laing pito ka bilyarista sa umaabot nga 1st Century Billiards 9-Ball sa Brampton, Ontario, Canada. Ang maong torneyo ipahigayon sa Marso 23-25, 2007.
"I hope nakapag-perform ako ng maganda sa Canada 9-Ball event," nagkanayon si Rota nga kalit og Sugbuanon ug beterano na sa Japan tournament.
Maoy ikauban nila ni Rota ug Mistica sa kampanya sa Canada sila si John Owat Salazar, Mark Wilson Apongol, Wilfredo Gadicho Apongol, Eric Garcia, Chris Barry Pablo ug Jeffrey Elliot de Leon.
Daghan ang nagpaabot nga impresibo ang kampanya nila ni Rota ug Mistica sa Canada. Gipangandaman nila kini'g maayo tungod kay usa kini ka prestihiyosong billiard event. Ang maong torneyo nagtangag og dakung ganti. Hinuon, mapaabot usab nga moagi ang Pinoy cue artist sa lungag sa dagum tungod kay segurado man nga hatagan sila'g maayong dula sa mga dekalibreng bilyarista sa lain-laing kanasoran nga ila unyang ikasangka. Pero daku gihapon og tsansa ang mga Pinoy.
Ang gilauman sa kadaghanan nga maoy manguna sa kampanya sa Pilipinas sa Ontario 9-Ball mao gayod sila si Rota ug Mistica. Sila man gud ang mas beterano kun itandi sa pito ka bilyarista nga ilang makauban. Mao nga bug-at nga tahas ang abagahon nila ni Rota ug Mistica sa ilang pagsalmot sa Ontario 9-Ball.
Congratulations ngadto ni Rodolfo 'Boy Samson' Luat kinsa maoy runner-up sa Derby City Classic 9-Ball Division nga gipahigayon sa Executive Hotel sa Louisville, Kentucky dili pa lang dugay. Gipilde si Luat ni eventual winner Neils 'The Terminator' Feijin sa finals. Nahulog sa bulsa ni Luat ang US$8,400 nga premyo ug lain pang US$3,000 human usab mahimong runner-up sa master of the table.
(Mga sugyot ug pakisayod? Text sa 0910-8105522)