2007 Inter-Church cagefest mosikad na

Upat ka teams -- duha gikan sa host Cebu ug duha sab gikan sa Davao City ang mag-abot sa korte sa pagbukas sa 2007 Inter-Church Basketball League (ICBL) karong gabii diha sa Immanuel Bible Center (IBC) gym sa barangay Banawa, ning siyudad.

Ang mga bisitang koponan mao ang Beautitudes Christian Fellowship ug ang River of God Christian Fellowship. Ubanan kini ni ICBL commissioner Pastor Gary Visitacion.

Ilang harungon ang host teams Living Word Christian Ministry-Athletes for Christ in Excellent Service (LWCM-ACES) ni Tribu Sugbu head coach Al Solis ug ang Blessed Hope Christian Fellowship.

Paningkamotan sa LWCM-ACES nga ilang madepensahan ang titulo nga ilang nasakmit human kini naghari sa season-ending CNetsBL niadtong Disyembre.

Ang Blessed Hope ni playing coach Caleb Gawangon nipahimutang sa ikaduhang dapit.

Matud pa ni tournament organizer ug M. Lhuillier Kwarta Padala-Cebu City Jewelers assistant coach Tata Merced nga adunay pagahimuon programa sa dili pa ang duwa sa alas-6:30 sa gabii.

Aron kahatagan og dugang exposure ang mga koponan, ang duwa pagahimuon sa nagkalain-laing binyu lakip na niini ang Pardo, Inayawan ug Punta Princesa. Ang championships pagaduwaon sa tournament's main hub sa IBC gym.

Ang maong torneyo mosubay og single round robin format diin ang nag-unang duha ka teams moharong sa lower-ranked squads sa cross-over semifinals.

Ang mga mananaog mag-ilog sa prestihiyosong titulo pinaagi sa winner-take-all affair, samtang ang mapilde maoy magsangka sa ikatulong dapit.