LACTEA nag-solo sa Bracket A

Ang LACTEA niposte sa ilang ikatulong daog sa dihang ilang gitiwasan ang dinaog-daog nga Atan Guardo-Lemon, 95-81, aron pag-solo sa unang dapit sa Bracket A sa Punta Princesa Sports Association (PPSA)-Tribu Guardo Sinulog Cup basketball tournament diha sa Vicente Sotto Memorial Gym sa Brgy. Punta Princesa.

Sa kombinasyon nilang Batoy Cañete ug power-center Chito Hernandez, ang Atan Guardo-Lemon nakadaginot pa og uno punto nga labaw, 19-18, paghuman sa unang kuwarter.

Apan ang LACTEA ubos sa paningkamot nilang Glenn Cabiluna, Dodong Espinosa ug Serge Cortez, nipakita sa ilang kaagresibo hinungdan nga nagpabaha kini sa ilang mga puntos dayon na ngadto sa ilang kadaugan.

Sa Bracket B, ang RCAF ni Romeo Faunillan nakatilaw na gyud og daog sud sa tulo nila ka duwa dihang ilang gipilde ang Felmar Enterprises, 96-90.

Grabe kaayo ang gipakitang duwa sa RCAF ug gani wala gyud kini motugot nga makalabaw ang Felmar. Hinuon nakatabla ang Felmar, 69-69 sa sayong bahin sa katapusang kuwarter ubos sa paningkamot nilang kanhi CDC Stallion Kokoy Astudillo ug ni 6-foot-4 Jordan Alano.

Si Fred del Campo nibuga og 16 sa iyang 18 puntos atol sa mainitong rally sa RCAF aron pagpabahar sa Felmar.

Hinuon, si Alwen Tabasa, mao gyud ang nangulo sa opensa sa RCAF sa iyang 28 puntos, samtang sila si Lyndon Binondo niamot og 15 puntos, sila si Dandre Baclay ug Rommel Garcia nagkumboya og 22 puntos alang sa RCAF.