CNetsBL gitakdang buksan sa Enero 28

Unom ka koponan ang kompirmadong mosalmot sa National Inter-Church basketball tournament nga buksan sa Enero 28, 2007 diha sa Immanuel Bible Center (IBC) gym sa Banawa.

Si CNetsBL Commissioner ug coach Lawrence 'Tata' Merced nagkanayon nga lakip sa makigsambunot sa maong torneyo, mao ang usa ka team gikan sa Manila, duha sa Mindanao ug tulo dinhi sa Cebu.

Morepresentar sa Cebu mao ang top three finishers sa bag-o lang natapos nga Christmas Conference, ang champion LWCM-Aces, ang runner up Sonship of Jesus Christ ug ang Blessed Hope Christian Fellowship.

Ang LWCM-Aces ni coach Al Solis nitumba sa Sonship of Jesus Christ aron paglaksi sa titulo sa CNetsBL niadtong miaging semana.