M.l. Jewelers hapit maremate

Nakaangkon og laing kinabuhi ang M. Lhuillier Kwarta Padala-Cebu City Jewelers human kini makabawos sa Cebu Landmaster-Mantawi sa Game- 2 sa iskor nga 83-71, aron pagpuwersa og rubbermatch sa ilang best-of-three Visayas Division Finals sa ML Kwarta Padala Mindanao Visayas Basketball Association (MVBA) Second Conference sa miaging gabii diha sa Cebu Coliseum.

Ang tinaktakay nga Game-3 karong adlawa anha gihapon duwaon sa Cebu Coliseum sa alas 6:30 sa gabii.

Ang Jewelers ni businessman-sportsman Michel Lhuillier ug head coach Raul 'Yayoy' Alcoseba miarangkada dayon pagsugod sa duwa hinungdan nga miposte kini og 19 puntos nga labaw, 40-21, sa sayong bahin sa ikaduhang kuwarter.

Ang Landmaster nakasikit sa iskor nga 43-46 sa nahabilin nga 7:36 sa ikatulong kuwarter, apan mao ra kadto ang labing nindot nilang nahimo gumikan kay sila si Enrico Llanto, Woodrow Enriquez, Jet Latonio ug Mike Manigo nagtambayayong aron pag-abli sa pultahan sa M. Lhuillier ngadto sa kalampusan.

Si Stephen Padilla maoy nangu sa M. Lhuillier bitbit ang 13 puntos ug gisundan kini ni Llanto, Latonio ug Enriquez nga mikimada og 12 puntos matag usa.

Si Bernie Ursal miratsada og 17 puntos alang sa Landmaster, samtang si Alex Cainglet mi-amot og 14 puntos.

Sa laing bahin, magbangga sab karong gabii ang Holcim Pryce Pharma-MisOr ni MVBA Chairman Oscar S. Moreno ug MP Warriors-GenSan ni Manny Pacquiao sa kaugalingon nilang Game 3 diin ang mopatigbabaw maoy mosakmit sa kampiyonato sa Mindanao Division.