Blanco suspenso

Ang Games and Amusement Board (GAB)-Cebu satellite office mipahamtang og silot ni referee Steve Blanco tungod sa gihimong "gross negligence" ug "incompetence" sa pag-officiate sa boxing match tali nilang Leon Maratas sa Loon, Bohol ug Lotlot Gaviola sa Butuan City niadtong Biyernes sa gabii diha sa Mandaue City Cultural and Sports Complex.

Ang Maratas-Gaviola brawl usa sa mga undercards sa World Boxing Organization (WBO) Asia Pacific minimumweight title clash tali nilang Donnie Nietes sa ALA Stable ug Indonesian Heri Amol. Si Nietes nidaog pinaagi sa second round knockout.

"We will no longer allow him (Blanco) to referee in any GAB-sanctioned pro-boxing matches for the rest of the year. We will thoroughly evaluate his performance to determine whether or not we are going to renew his license next year. For the time being, his status is 'grounded'," matud pa ni GAB-Cebu supervisor Lando Mendoza.

Kahinumduman, si Gaviola mihimo og dili momenos unom ka "low blows" batok ni Maratas sa wala pa hunonga ang away diin gipadaog ni Blanco ang Boholanong boxer. Sa nag-unang upat ka hugna, si Gaviola nakahimo na og tulo ka illegal blows. Hinuon nakuhaan og uno punto si Gaviola apan wala kini mohatag og warning o reprimand sa bisitang boksidor sa iyang gihimo.