Bullettes nilangkat sa titulo

Ang Manila Nomads Bullettes milangkat sa korona sa inaugural CCRFC Triangular Ladies Touch Rugby Tournament human gipilde ang Cebu City Rugby Football Club Pink Dragons sa iskor nga 3-2 niadtong Domingo diha sa Camp Lapu-Lapu parade grounds.

Ang Bullettes, ang labing unang ladies touch rugby club nga natukod dinhi sa Pilipinas, nagsalig sa ilang kasinatian aron pagpukan sa neophyte Pink Dragons sa overtime.

Ang kampiyonato gisugdan uban sa Bullettes nga ni-iskor sa unang minuto sa game. Mao kadto ang bugtong iskor nga nahimo sud sa first half diin ang Pink Dragons.

Sa second half, ang Pink Dragons nipalig-on sa ilang opensa nga maoy nakaguba sa depensa sa Bullettes hinungdan nga nakakutlo kini og puntos ug nakatabla pa sa iskor, 2-2 nga maoy nagduso ngadto sa overtime.

Sa overtime, ang duha ka teams pulos mipabuhagay sa ilang impresibong opensa ug naningkamot nga maka-iskor. Tungod sa kahugot sa depensa nagbalhin-balhin ang ball possession hangtod nga ang Bullettes nisiak sa ilang panagtabla human kini maka-iskor sa katapusang dos minutos sa duwa.

Bisan pa sa ilang kapildihan, ang Pink Dragons milampos gihapon sa ilang debut bisan og bag-o pa kining miapil.

Ang ilang line gipili gikan sa tanang female players nga nisalmot sa CCRFC-Castrol Touch Rugby League nga natapos niadtong Septiyembre 10.

Ang torneyo nagmalampusong pinaagi sa suporta sa Badgers Restaurant and Sports Pub, Satarra International, The Sandtrap Sports Bar and Restaurant, PhilPacific Insurance Corporation ug Guard-All Security Systems.