USC-NC nakakuha finals ticket

Ang University of San Carlos-North Campus maoy unang nakakuhag finals ticket sa upat ka USC squads nga miduwa sa semifinal round sa Milo Basketball Efficiency and Scientific Training (BEST)-Basketball Tournament kagahapon diha sa Don Bosco College gym.

Ang USC North Campus-B dribblers milangkat og 59-55 nga kadaugan batok sa University of Cebu (UC) sa passerelle division.

Naglabaw unta ang UC Webmasters sa final canto, apan kalit nga nausab ang dagan sa duwa dihang si Adrian Armenion sa USC mipasulod sa iyang mga 3-points .

Si John Otida maoy nangulo sa opensa sa USC-NC sa iyang 13 puntos, siyete puntos niini iyang nakuha sa ikaduhang kuwarter. Miabag sab si Jordan Nuneza, kinsa nikimada og 10 puntos ug si Adrian Armenion miamot og nuybe puntos ug pulos gikan sa three-point area.

Sa maong kadaugan, ang USC magpaabot na lang sa modaog tali sa Don Bosco College ug sa igsuong koponan USC-South Campus nga maoy ikaatbang sa kampiyonato.

Ang finals sugdan sunod semana.

Ang mga mananaog sa Cebu eliminations moharong sa top teams sa Iloilo ug Bacolod alang sa Visayas finals karong Nobiyembre 18 didto sa Iloilo City.

Samtang ang Visayas winners makigsangka sa laing kampiyon gikan sa Luzon, NCR ug Mindanao alang sa National crown sa nanghinapos nga bahin ning tuiga.