World class ang Pinoy

Kun billiard na gani ang hisgutan, dili malalis nga dili gayod mabentahaan sa abilidad ang mga Filipino. Kun ang ubang kanasoran adunay Rodney Morris, Johnny Archer, Earl Strickland, Mika Immonen, Ralf Souquet, ugbp., ang Pilipinas aduna usab ing ikapasigarbo nga Efren 'Bata' Reyes, Francisco 'Django' Bustamante, Alex 'The Lion' Pagulayan, Jose 'Amang' Parica, Dennis 'Surigao' Orcullo ug daghan pang uban nga taas nang tukion dinhi.

The bisan asang internasyonal nga kompetisyon, migilak pag-ayo ang bituon sa mga bilyaristang Pinoy. Dili lang maayong laki ang atong mga magdudula dinhi sa kaugalingon natong silong kondili gikaintapan usab sila sa ilang pagpangayaw sa pagdulag billiard sa laing kanasoran. Gani, ang atong mga bilyarista nakabaton man og taas nga respeto sa kalibotan sa billiard sports. Kini ang magmatuod nga world class ang mga bilyaristang Pinoy.

* * *

Makadaghan na pamatud-i sa atong mga bilyarista nga dili mabentahaan sa mga magdudula sa ubang kanasoran ang ilang abilidad sa paggunit sa tako. Tungod niini, angay gayod pasidak-an sa atong nasud kining maong dula. Sama gud sa Mexico. Sa nakita nga daghan ang mga Meksikano nga may abilidad sa pagsul-ob og gloves, gihatagan nila'g dakung pagtagad ang maong matang sa sports. Kini ang hinungdan nga sa bisan unsang division sa pamuksing o sa bisan unsang weight class, may Mexicano gayod nga boksidor nga haom sa maong timbang. Kini tungod kay hilabihan kadaghan ang mga Meksikano nga nag-develop sa pagka boksidor.

* * *

Dinhi sa atong nasud, sikat usab ang boksing tungod kay may abilidad usab ang Pinoy sa maong matang sa sports. Pero bahin sa billiards, akong nakita nga ingon sa kulang pa kita sa pagtagad sa maong dula luyo sa kamatuoran nga daghan na kita'g mga world class champion sa maong disiplina. Tinuod, sa bisan asang dapit makita nato ang daghang bilyaran. May mga torneyo usab nga ipahigayon sa lain-laing dapit. Mga lokal nga torneyo nga sarang makahatag og konsuylo sa mga bilyarista.

Pero wala kini makahatag og katagbawan kanako. Ang akong assessment niini mao nga taphaw ra gihapon ang atong pagtagad sa maong dula. Kini tungod kay wala kita mosawom ngadto sa mas lawom nga dagat. Ang buot kong ipasabot mao nga wala nato pahimug-ati ug paladmi ang atong paghatag og importansiya sa maong dula. Ang gusto kong mahitabo mao nga ang atong paghatag og pagtagad sa maong dula mosangko unta sa level nga posibleng makadalit og kakulahanan sa katawhan, aktibo man nga magdudula o yano nga billiard aficionados.

Ang atong kagamhanan daku'g ikatabang niini. May mahimo usab niini ang Billiard and Snooker Congress of the Philippines (BSCP) ug ang Corporate Billiards League (CBL). Atong palambuon ang billiard sport sa atong nasud.

* * *

(Mga sugyot ug pakisayod? Text sa 0910-8105522)