Maratas natikuko sa kumo ni Bautista

Bagis kaayo ang gipakitang abilidad ni Boholano boxing sensation Rey 'Boom Boom' Bautista sa labing una niyang pagpakita og away sa publiko gikan sa sunod-sunod nga injuries dihang iyang gipalukapa si super bantamweight prospect Leon Maratas atol sa ilang sparring sa miaging gabii diha sa ALA Fight Club sa Banilad Town Center.

Ang 20-anyos nga si Bautista mipatugpa og makabungog nga left uppercut ngadto sa tiyan nga maoy nakapahagba ni Maratas sa ikaduhang hugna.

"Gisakitan og maayo si Maratas sa kumo ni Bautista kay mireklamo kini nga naglisud kuno siya og ginhawa. Mao to nga amo dayon nga gi-undang ang sparring kay miingon man siya nga dili na niya makaya," matud pa ni ALA Boxing Gym chief trainer Edito 'ALA' Villamor.

Midugang si Villamor nga impresibo sab kaayo si Bautista sa sparring niini batok nilang Reman Salim ug amateur standout Mark John Yap, nga mag-pro sunod bulan ubos sa super flyweight division.

Sila si Bautista ug Villamor gikatakda nga molarga sa Los Angeles, California karong Oktubre 25 alang sa ilang hugtanong pagbansay-bansay didto sa Wild Card Gym sa Hollywood nga gipanag-iya sa notadong American trainer nga si Freddie Roach.

Si Bautista gikatakdang makigbinukbukay ni Brazilian champion Giovanni 'The Bomber' Andrade karong Disyembre 2 didto sa St. Peter Times Square sa Tampa, Florida.