Mantawi mo-host sa ML Kwarta Padala

Ang aksiyon sa Visayas Division sa ML Kwarta Padala Mindanao Visayas Basketball Association (MVBA) Second Conference mosikad ugmang adlawa diin ang Cebu Landmaster-Mantawi maoy mo-host sa inaugural champion M. Lhuillier Kwarta Padala-Cebu City Jewelers.

Ang bugtong duwa gikatakdang sugdan sa alas 5:30 sa hapon diha sa Mandaue City Sports and Cultural Complex.

"Aw andam na kaayo mi. Hinaut nga makadepensa mi sa among korona," matud pa ni MVBA founder ug M. Lhuillier coach Raul 'Yayoy' Alcoseba.

"Mas lisud karon ang challenge namo tungod sa crossover format kay moduwa man mi batok sa Mindanao teams sa elimination round," dugang pa ni Alcoseba.

Mga karaang magduduwa maoy gilauman ni Alcoseba gumikan kay wala na man uban sa iyang team sila si Ardy Larong, Jet Latonio, Ryan Dy ug Reed Friar Juntilla.

Mga beteranong players nga mobanat sa ML Kwarta-Padala-Cebu mao sila si Mike Manigo, Stephen Padilla, Woodrow Enriquez, Danny Aying ug Alano Caputolan uban sa duha ka banggiitang collegiate players nga sila si Jayford Rodriguez ug Enrico Llanto.

Bugtong napuno sa ilang lineup mao si Aletroy Mercader, teammate ni Llanto sa USC Warriors.

Sa habig sa Cebu Landmasters mipalig-on kini og maayo sa ilang kampanya sa kampiyonato.

Ang Landmasters ubos ni coach Leoncio 'Jun' Tan, Jr. mikuha sa serbisyo nilang kanhi PBA star Dale Singson, kanhi sentro sa PCU Dolphin nga si Joel Solis uban sa beteranong mga guwardiya nga sila si Raul Redulosa, Abe Galinato ug Michael Luga.

Moduwa sila uban nilang Alex Cainglet, Bernie Ursal, Rex Mangubat, Ian Saladaga, Carlos Sayon ug Luther Justiniani.

"Kun moduwa lang sila as a team, sa akong tan-aw daku mi og tsansa nga ma-champion," matud pa ni Tan.

Lain pang mobanat sa Visayas Division mao ang MLSDF-Talisay City Aquastars ni coach Eddie Ybañez ug ang Toyota-Iloilo Warriors.