'Bata' Reyes, Bustamante milangkat sa korona

Duha ka notadong bilyarista sa Pilipinas nga sila si Efren 'Bata' Reyes ug Francisco 'Django' Bustamante, nikulit na sab sa ilang pangan sa kasaysayan human nila gilangkat ang labing unang kampiyonato sa PartyPoker.com World Cup of Pool.

Ginamit ang talagsaon nilang abilidad sa binorakay didto sa The Newport Centre sa Newport, South Wales, sila si Reyes ug Bustamante mimakmak nilang Earl Strickland ug Rodney Morris sa Team USA, 13-5, aron pagsakmit sa US$60,000 (P3.18) milyones nga ganti.

"This is a very important tournament and we are happy and very proud to win the first World Cup. In the beginning of the match there was a lot of pressure on us but when we went three games ahead it all lifted," matud ni Bustamante segun sa taho sa www.worldcupofpool.com, ang opisyal nga website sa maong torneyo.

Ang mga Pinoy miratsada ug milabaw sa iskor nga 3-0, apan sila si Strickland ug Morris wala sab magpabitin gumikan kay nakatabla sila sa duha ka higayon, ang katapusan sa iskor nga 4-4.

Kini gumikan kay giharos og daog nilang Reyes ug Bustamante ang sunod nga unom ka racks aron pagposte og komportableng labaw, 10-4.

Usa lang ka higayon nga nakatubag ang Amerikano gumikan kay ang katapusang tulo ka racks giangkon man nilang Reyes ug Bustamante aron pagselyado sa impresibo nilang kadaugan.

Sila si Strickland ug Morris nagantihan og US$30,000.

Miabot ngadto sa 32 ka nasud nga girepresentahan og tagduha ka players ang misalmot sa maong torneyo nga miapud-apud og kinatibuk-ang US$250,000 nga ganti sa mga mananaog.