Flores hilum nga nanulong

Sa hilum, nitugpa na si WBO Asia Pacific flyweight champion Rexon Flores didto sa teritoryo sa iyang kaatbang uban ang paglaum nga mahatagan ang Pilipinas og usa ka lehitimong world boxing champion.

Mao kini ang dakung tahas ni Flores sa iyang paghagit ni defending champion Omar Andres 'The Hurricane' Narvaez alang sa WBO flyweight title karong Agosto 5 didto sa 12,000-seater Super Domo Orfeo sa Cordoba, Argentina.

Ang 23-anyos nga si Flores mipadayag nga andam na kaayo siya nga makigbinakbakay ni Narvaez ug mipasalig kini nga buhaton niya kutob sa iyang mahimo aron makahatag og kadungganan sa nasud.

"Maningkamot ko og maayo aron modaog kay kining awaya alang sa atong nasud," matud pa ni Flores ngadto sa iyang manedyer nga si Gabriel 'Bebot' Elorde, Jr.

Kagahapon, ang taga-Cadiz City, Negros Occidental nga si Flores ug si Narvaez nag-abot sa labing unang higayon atol sa "press preview" nga didto gipahigayon sa usa ka pribadong gym dili layo sa gipuy-an nilang Sheraton Hotel.

Ang maong away maoy mandatory defense alang ni Narvaez batok ni Flores nga maoy top challenger.

Si Flores nagbitbit og 16-2-3 win-loss-draw record uban ang 8KOs, samtang ang garbo sa Argentina nga si Narvaez way pilde sa 23 ka away uban ang duha ka tabla ug 15 ka daog pinaagi sa knockout.