11th Adidas Streetball: Challenge sugdan na

Tuyo ug tumong sa University of Cebu (UC) Webmasters ug sa University of San Carlos (USC) Lady Warriors mao ang pagsakmit sa kampiyonato sa tagsa-tagsa nila ka dibisyon sa Cebu leg sa 11th Adidas Streetball Challenge nga gitakdang moulbo karon adlawa diha sa Sacred Heart School-Jesuit (SHS-J) gym.

Bisan gikanselar ang regional finals, apan ang organizers sa maong kalihukan padayong modawat sa out-of-towners gikan sa Kabisay-an nga buot moapil sa torneyo.

Wala makuha ang ensaktong gidaghanon sa mga partisipante gumikan kay nagpadayon pa man ang screening sa pagsulat niini.

Gawas sa UC ug USC, lain pang mga koponan nga mokumbati mao ang University of the Visayas (UV), University of San Jose-Recoletos (USJ-R), Cebu Institute of Technology (CIT), Cebu Eastern College (CEC), University of Southern Philippines-Foundation (USP-F) ug ang host SHS-J.

Gawas sa aksiyon sa 18-under boys ug ang girls categories, ipahigayon sab ang naandan nga media 3-on-3.