Espinosa bayani sa Tipasi All-Stars

Nahimong bayani ang kanhi University of Southern Philippines (USP) Panthers nga si Dodong Espinosa human kini mipasulod og kuwatro puntos sa katapusang 27 segundos aron paghatod sa iyang koponan nga Tipasi All-Star batok sa CX Plus John Arne Construction sa iskor nga 62-60 sa Sunday-Wednesday Friends Club basketball tournament diha sa CEC gym.

Ang unang itsa ni Espinosa maoy nakatabla sa iskor, 60-60. Sa sunod nga posisyon, iyang nailog ang inbound pass sa John Arne ug nakapuntos kini pinaagi sa iyang breakaway layup sa nahabiling singko segundos sa wala pa ang katapusang sirbato sa buzzer.

Ang John Arne nga nakigkumbati bisan wala ang ilang top gunner nga si Vincent 'Inting' Reyes ug coach Boy Te, adunay katapusang posisyon, apan pakyas sila pagmugna og puntos tungod sa hugot nga depensa nga gihimo sa Tipasi.

Ang Tipasi All-Stars nalubong og 19 puntos, 29-10, sa sayong bahin sa ikaduhang kuwarter apan yano ra kaayo kini nilang napapas ug nakasikit pa sa iskor, 36-37 paghuman sa unang tunga pabor sa John Arne.

Sa tanto nilang sinukliay og mga puntos, migawas gyud nga mananaog ang Tipasi All-Stars.

Bisan og napilde ang John Arne daku pa gihapon kaayo kini og purohan nga makasulod sa finals.