Lady Archers dinungisan ng Lady Stags

Ipinalasap ng San Sebastian ang kanuna-unahang kabiguan ng De La Salle makaraan ang 11 panalo nang igupo ng Lady Stags ang Lady Archers, 25-13, 17-25, 25-18, 34-32 at lumapit sa ikalawang finals berth ng V-League na ipiniprisinta ng Shakey’s sa Blue Eagle Gym.

Naungusan ni Jaroensri Bualee si Jindarat Kanchana sa duelo ng Thai imports, makaraang magpakawala ng 31 puntos kabilang na ang dalawang kills na tumusok sa depensa ng De La Salle sa kanilang isang oras at 53 minutong bakbakan sa torneong hatid ng Shakey’s Pizza at inorganisa ng Sports Vision.

Nauna rito, tuluyang isinara ng Lyceum ang pag-asa ng FEU sa pamamagitan ng 25-17, 25-21, 25-19 panalo sa torneong suportado din ng Accel, Mikasa, Aquabest, VFresh, ABC-5 at ABC Sports.