Softball tournament kumbatihan karon diha sa Mandaue

Mag-abot karong adlawa ang mga mahiligon og softball diha sa Ouano Softball Ground sa barangay Looc, dakbayan sa Mandaue.

Untop alas-8:00 karong buntag, mosikad ang parada nga salmotan sa mga partisipanteng koponan, uban sa mga opisyales diha sa nahisgutang softball ground diin himuon usab ang opening ceremonies.

Napulo'g-duha ka koponan -- walo gikan sa senior division ug upat sa junior ang magtige ning maong kompetisyon nga gipasiugdahan sa Barangay Cambaro Youth Organization Against Drugs (BCYOAD).

Mga koponan nga mopakita'g aksiyon sa senior division mao ang American Feeds, Pau de Arco, Bearn's Ang, SC Salazar Institute of Technology (SIT), Poblacion Loocan, Lapu-Lapu City, Pusok All Star sa Lapu-Lapu City, Sirlitz Punta Princesa ug Aldrich (Pau de Arco).

Samtang sa junior division mao ang Swing Cambaro, Cambaro Warriors, Paknaan Selection sa Mandaue City ug Bambo San Antonio.

Ang maong mga koponan moduwa og double elimination.

Ang maong torneyo natukod ubos sa paningkamot nilang Sancho 'Boy' Lumapas Jr., organizer sa BCYOAD, Joe Cababahay ug Alfredo Dignos, chairman ug ground committees uban sa abag ni tournament coordinator ret. SPO4 Rodolfo G. Dignos.