Diez mibira korona sa Guardo cycling event

Gibira ni Joseph Diez ang korona sa junior/senior divisions sa mountainbike event sa Guardo Xtreme Road and Mountainbike Challenge kagahapon diha sa Paseo San Ramon grounds sa Banawa, ning siyudad.

Gipukan ni Diez ang sakop kanhi sa national training pool Evic Largo pinaagi sa pagtapos sa lumba sa oras nga 43 minutos ug 43:74 segundos. Samtang ang nagsunod niini nga si Largo mitapos sa oras nga 44.52:11.

Si Norman Navarro maoy mipahiluna sa ikatulong dapit sa oras nga 44 minutos ug 52.11 segundos.

Sa laing bahin, si Jonathan Simbajon maoy miangkon sa kinatas-ang dapit sa executive ug sa fatboys class.

Gipilde ni Simbajon sila si Jun Taneo ug Benito Javier, kinsa mitapos sa ikaduha ug ikatulong dapit.

Sa laing combined class sa masters ug veterans, ang kanhi Tour champion nga si Rolando Pagnanawaon maoy miangkon sa unang dapit, gisundan kini ni Teodorico Tumulak alang sa ikaduhang dapit, samtang si Ronald Navarro maoy miangkon sa ikatulong dapit.

Si Patrick Laborte maoy kinakusgan sa mga beginners, iyang gipilde ang Philippine Mountainbike Tour's youth division champion Eusebio Ravanes, kinsa mipahiluna sa ikaduhang dapit ug si Michael Tabasa maoy mipasilong sa ikatulong dapit.