Palaro binagyo, pero tuloy pa rin

NAGA City – Kumpara sa mga nakalipas na araw, hindi ang mga atleta ang umagaw ng eksena sa 2006 Palarong Pambansa kahapon kundi ang bagyong si Caloy.

Bunga ng pananalanta ng bagyong si Caloy, nadatnan ng mga atleta at opisyales ang mga nagkalat na mga nakabuwal na puno, maputik na kalsada, nakatumbang mga steel fences at brownout dito sa Metro Naga Sports Complex.

"Inilikas na namin ‘yung Northern Mindanao delegation to Naga City Science High School from Mabolo Elementary School kasi tumataas ‘yung tubig doon sa Bicol River kapag sobrang lakas ng ulan," ani Joe Perez, media coordinator ng Naga City sa ginagawa nilang paglilikas sa ilang delegasyon.

"Kung may signs na lumalakas pa ‘yung ulan, ililipat rin namin ‘yung ibang delegation to a safer grounds."

Ilang atleta rin sa athletics ang ginamot dahilan sa pagkakadulas sa tinatakbuhan nilang track oval.

"Hindi naman masyadong problema ‘yung pag-ulan kasi may mga spikes naman ‘yung mga sapatos ng athletes eh," ani Benjamin Silva-Netto, tournament director ng athletics event.

Pinatotohanan naman ito ng mga gold medalists na sina Florence Acacio ng Region I (IRAA) sa elementary girls’ high jump, Emmanuel Lucas ng Region CAR (CARAA) sa secondary boys’ 4x400m relay at Marjorie Laguna sa elementary girls’ 4x400m relay.

Sa boxing na inilaro sa stage ng Naga City Plaza, sumuntok ng gintong medalya sina powderweight Gerson Nietes ng Region VI (WVRAA), mosquitoweight Aaron Rodriguez ng Region XII (CRAA), paperweight Victorio Saludar III ng Region XI (DAVRAA), pinweight John Riel Casimero ng Region VIII (EVRAA) at light flyweight Froilan Saludar ng Region XI (DAVRAA). 

Pinabagsak ni Nietes si Dandy Daygon ng Region XII (CRAA); dinaig ni Rodriguez si Welbeth Loberanis ng Region VII (CVRAA); tinalo ni Victorio Saludar si Jestoni Yuson ng Region VII (CVRAA); iginupo ni Casimero si Christopher Obillo ng Region I (IRAA); at itinumba ni Froilan Saludar si Jill Libaton, Jr. ng Region XII (CRAA). (Russell Cadayona)