Salamat sa imong text. Akong giutingkay ang lain-laing tinubdan sa kasayoran akong nasuta nga daku sab ang nahimong achievement ni Efren 'Bata' Reyes sa milabay'ng tuig nga 2005.
Sa maong tuig, nakahipos si Reyes sa katibuk-ang torneyo nga $279,169.00. Ang mao niyang premyo igo na aron siya ang mag-una sa money list segun sa talaan sa billiard website nga Azbilliards.com.
Sa pag-apil ni Reyes sa UPA Pro Tour Championship, mipahimutang siya sa ikaupat nga dapit ug nakuha niya ang premyo nga $3,000.00. Sa Derby City Classic Bank Division igo lang nakapuwesto ang The Magician sa ika-13 nga luna diin nakuha niya ang premyo nga $435.00.
Sa Derby City Classic One Pocket, si Reyes ang migulang kampiyon ug nakuha niya ang $10,000.00 top prize. Siya usab ang kampiyon sa Derby City Classic 9-Ball nga may premyo nga $13,484.00. Siya gihapon ang kampiyon sa Derby City Classic Master Of The Table nga may premyo nga $20,000.00.
Sa iyang pag-apil sa San Miguel Asian 9-Ball Tour Stop, mipahimutang si Reyes sa ikalimang dapit ug nakuha niya ang premyo nga $1,750.00. Miapil usab si Bata sa 2005 Japan Open diin siya ang nahimong kampiyon ug nasungkit niya ang premyo nga $10,000.00. Lain niyang first place finish mao ang sa laing hugna sa San Miguel Asian 9-BallTour Stop nga may premyo nga $10,000.00.
Sa lain pang hugna sa San Miguel Asian 9-Ball Tour Stop mipahimutang si Reyes sa ikalima nga dapit nga may premyo nga $1,750.00. Sa katapusang hugna sa San Miguel Asian 9-Ball Tour Stop, mipahimutang si Reyes sa ikasiyam nga dapit nga may premyo nga $1,250.00.
Ang labing pobre nga performance ni Reyes sa 2005 mao ang iyang pag-apil sa 2005 World Pool Championship diin nahimutang lang siya sa ika-81 nga dapit. Ang nadawat niyang pahalipay mikabat lang sa $500.00. Mao usab kini ang kantidad nga iyang nadawat sa iyang pag-apil sa Big Apple 9-Ball Classic diin mipahiluna siya sa ikasiyam nga dapit.
Mipahimutang si Reyes sa ikatulong dapit sa Joss NE 9-Ball Tour Season Finale nga may premyo nga $4,000.00. Nahimutang siya sa ika-17 nga luna sa 2005 US Open uban ang premyo nga $2,500.00. Siya ang kampiyon sa IPT King of the Hill 8-Ball Shoot Out nga may premyo nga $200,000.00