Dennis Rodman mo-abot karon

Kasaysayan makulit karong adlawa gumikan kay ang kanhi Chicago Bulls star nga si Dennis Rodman ug ang NBA Legends mo-abot na aron makigharong batok sa San Miguel Corporation (SMC) All-Stars sa usa ka exhibition match nga ulohan og "Bad Boy Tour" sa alas 7:00 sa gabii diha sa Mandaue City Sports and Cultural Complex.

Gawas ni Rodman, naglangkob sa NBA Legends mao sila si Hall of Famers Alex English ug Calvin Murphy, backboard-smasher Darryl Dawkins, Sidney Moncrief ug Otis Birdsong. Mopalig-on sa ilang puwersa mao ang upat ngadto sa unom ka Amerikanong mga import.

Ang NBA makigtakos batok sa pipila ka kanhi sikat nga basketbolista sa Pilipinas nga gilangkuban nilang Allan Caidic, Pido Jarencio, Ato Agustin, Vince Hizon ug Chito Loyzaga.

Moduwa uban sa SMC All-Stars mao sila si Tony Boy Espinosa, Bobby Jose, Ed Cordero, Joey Sta. Maria, Ronald Magtulis, Peter Martin ug Chris Bolado.

Human sa ilang pag-abot sa alas 10:00 karong buntag sa Mactan International Airport, ang NBA Legends molahos dayon sa Mandaue City Hall aron mohimo og courtesy call ni Mandaue City Mayor Thadeo Z. Ouano.

Si Mandaue City Sports Development Commission chairperson Cheryl Ouano nagkanayon nga hugot kaayong seguridad ang ilang ipahamtang alang ni Rodman ug sa mga kaubanan niini.

"Security will be strict. We will deploy some members of the Special Weapons and Tactics (SWAT) and utilize other available security forces to ensure the safety of Rodman and his party," matud pa ni Ouano.

Masentro sa atensiyon karong gabii mao si Rodman, ang gi-ilang orihinal nga 'Bad Boy' sa NBA.

Si Rodman, nga duha ka higayon nga namiyembro sa All-Star, nakaangkon og lima ka kampiyonato sa NBA, tulo niini uban sa Bulls diin iyang teammate mao si Michael Jordan. Ang lain duha ka korona ni Rodman iyang naangkon uban sa Detroit Pistons.

Nailhan og maayo si Rodman sa maayo niyang modepensa ug ingon man sa nilangkatay sa bola.

Ang mga tiket sa "Bad Boy Tour," nga usa ka hiniusang proyekto sa dakbayan sa Mandaue ug sa probinsiya sa Sugbu ubos sa liderato ni Governor Gwen Garcia, nagkantidad og P10,000 sa VIP, P5,000 ug P2,500 sa ringside, P1,500 ug P1,000 sa lower box ug P500 sa general admission.