Badyet para sa 2006 Palaro gi-aprobahan na sa DBM

Giaprobahan na sa Department of Budget and Management (DBM) ang P54 million budget alang sa pagpahigayon sa 2006 Palarong Pambansa nga gitakda karong Mayo 7-13 didto sa Naga City.

Mao kini ang gikompirmar ni Department of Education (DepEd) undersecretary Ramon Bacani.

Ang pag-uyon sa badyet kortesiya ni DBM secretary Rolando G. Andaya, kinsa mitunol sa iyang kinatibuk-ang suporta ning maong dakung school-based athletic competition.

Ang badyet nga gialokar alang sa Palaro nadoble itandi sa miaging tuig uban sa PAGCOR nga mibubo og P20 million.

Ang dakung pudyot sa badyet mapunta sa nagkalain-laing regional associations alang sa ilang galastohanan lakip na ang transportation, uniporme sa mga delegado ug food allowance.

Nasayran usab sa The Freeman Banat News nga ang Central Visayas Regional Athletic Association (CVIRAA) nakakuha og P2.6 nga gahin alang sa Palaro.

Sumala pa ni DepEd-7 Physical and School Sports chief Vivian Ginete nga bisan ang badyet dili paigo, si Andaya miingon ang badyet makatarunganong gibahin sa 17 ka rehiyons nga mo-compete sa Palaro.