Sa dakbayan sa Sugbo, nanungha ang daghang bilyaran sa lainlaing mga dapit. Hapit sa tanang mga kalye nga makakaplag kita'g mga bilyaran. May mga bilyaran na usab sa mga mall. Bisan gani sa mga hotel aduna na usay mga bilyaran nga sarang kapahimuslan sa atong mga bilyarista.
Sama pananglit sa Cebu Business Hotel, aduna nay billiard center ang maong hotel. Luho ang maong dapit ug kombeniyente alang sa mga magdudula. Dili man sab daku kaayo ang magasto kun sa maong bilyaran magdula tungod kay gipahaom man kini sa maabot sa bulsa sa mga magdudula.
Ang billiard center sa CBH akong nasuta nga usa ka haom ug maanindot nga lugar sa pagdula og billiard. Gawas nga bugnaw, luag kaayo ang dulaanan ug dili gayod bation og kabakikaw ang mga magdudula. Sa maong dapit, seguradong relaks ang hunahuna ug panglihok sa magdudula.
Sukad pa kaniadto, ang mga bilyaran gipahimutang sa mga luho nga dapit. Usa na niini ang bilyaran sa Pransiya niadtong tuig 1429. Luho kaayo ang maong bilyaran tungod kay mga tinamod man ang mga tawo nga modula niini. Hunahunaa lang nga usa sa modula og bilyar sa Pransiya mao si Hari Luis XI (1461-83).
Mao nga dili kita angay mahibulong kun niining panahona aduna nay daghang mga bilyaran dinhi sa atong dakbayan nga gibutang sa luho nga dapit. Nasuta sa usa ka pagtuon nga makahatag og dakung comfort sa magdudula ang pagdula sulod sa usa ka luyo ug hamugaway nga lugar. Walay pressure. Makarelaks ang magdudula sa iyang kaugalingon ug tungod niini, makahunahuna siyang maayong diskarte aron makapasiugda og nindot nga performance sa dula.
Hinuon, gisugyot usab sa mga eskperto nga labing maayo nga sulayan sa magdudula ang pagdula sa usa ka yagaw nga lugar. Kinahanglan man gud nga anaron niya ang iyang kaugalingon sa pagdula nga may mga mata nga nagtan-aw kaniya. Kay sa matchplay, dili kalikayan nga aduna gayoy mga tumatan-aw.
Pero kun ang tuyo mao ang lunsay nga pagbansay aron makakaplag og bag-ong mga taktika sa dula, mas maayo nga adto magdula sa usa ka luho nga dapit aron walay makadiskubre. Niini, maka-concentrate ang magdudula sa iyang pagbansay.