2nd Sirlitz training camp sugdan Abril 3

Ang 2nd Sirlitz One-on-One Play Like A Pro basketball clinic mosikad karong Abril 3 diha sa Guadalupe Sports Complex.

Gilauman ni training camp director Edcel Vallena nga makadani kini og daghang partisipante human kini makakuha og 224 ka tinun-an sa miaging tuig.

Si Vallena mitunol sa iyang pasalamat ngadto ni Sirlitz owners ug notadong sportsman Lito S. Gillamac Jr. sa pagpadagan niining training camp sulod na sa duha ka tuig.

Matud ni Vallena nga ang registration gitakda karong Abril 1-2. Ang entry fee nagkantidad og P1,000 matag estudyante sulod sa usa ka buwan nga training. Ang pagpanglista himuon sa ala-1:00 hangtod sa alas-5:00 sa hapon.

Ang tanang partisipante makadawat og usa ka basketball, reversible jerseys ug Sirlitz t-shirt.

Sama sa miaging tuig, ang training camp gibuak sa duha ka sesyon. Ang unang session alang niadtong beginners sa alas 10:00 sa buntag hangtod sa alas-12:00 sa udto, samtang ang ikaduhang session alang sa advanced level nga sugdan sa ala-1:00 hangtod sa alas-3:00 sa hapon.