Apan wala makurat ang kaatbang niini nga Montana Pawnshop Jewellers-Davao og ilang gipalukapa ang Pacman squad sa iskor nga 79-78 pinaagi sa overtime.
Ang Montana maoy naka-una sa pagkulit og puntos pinaagi ni forward Mark Bonifacio. Niini, ang PacMan-General Santos mibawos gilayon pinaagi sa lay-up ni Pacquiao nga nakapahugyaw og maayo sa mga fans.
Init kaayo ang gipakitang aksiyon sa duha ka koponan sanglit determinado kini nga maoy unang makakuha og daog sa torneyo. Ang duha ka koponan nag-iyahay sa pagpatuasik sa ilang naglagiting nga opensa hinungdan nga miresulta kini sa overtime.
Hayag unta nga makuha sa Pacman ang kalampusan dihang ilang naalkansi ang Montana og dos puntos sa himalatyong bahin sa duwa, apan si Mark Legarde sa Montana, agresibong mipasulod sa iyang layup sa nahabiling 5 segundos aron pagtabla sa duwa. 70-70 hinungdan nga miresulta sa kulbahinam nga overtime.
Sa overtime, wala lang gihapo'y swerte ang Pacman squad sanglit ila na untang naalkansi og 3 puntos kaatbang una pa nakatabla ang Montana pinaagi sa makabungog nga 3-pointer ni Ryan Abanes sa nahabiling 30 segundos.
Nahugno ang paglaum sa Pacman dihang si Randy Panerio sa MOnatana nakakuha ug foul gikan ni Dondon Tadena sa nahabiling dos segundos.
Si Panerio kalmadong mipasulod sa iyang usa sa duha ka free throw aron sa pagselyado sa ilang kadaogan.
Si Dado Ayson mipabuto og 16 sa iyang kinatibuk-ang 22 puntos sulod sa second half aron sa pagpangulo sa Montana nga gisundan usab ni Panerio kinsa milangkat og 15 puntos samtang si Norberto Farochillen maoy nangulo sa pilderong Pacman sa iyang 17 puntos.
Sa laing duwa, ang team host nga Iligan City misakmit usab sa ilang unang daog dihang ilang gipakugangan ang bisitang Pryce Pharma-Misamis Oriental, 91-88.
Unang duwa:
Montana-Davao (79) - Ayson 22, Panerio 15, Legarde 12, Abanes 7, Butel 7, Bonifacio 7, Dawal 4, Quibod 3, Bajenting 1, Guno 1
Pacman-GenSan (78) - Farochillen 17, Tadena 15, Coronado 14, Recustodio 6, Rubi 4, Medalla 4, Dennison 4, Sandoval 6, Locsin 6, Pacquiao 2
Ikaduhang duwa:
Iligan (91) - Bognot 21, Tundag 18, Araman 16, Pening 12, Serino 6, Gloria 5, Bangloy 5, Cosingan 3, Pendang 3, Pagaling 2
Pryce Pharma-MisOr (88) - Alfeche 17, Laygo 14, Mendoza 13, Mercado 10, Carretas 8, Saludsod 7, Trumpeta 6, Lumantas 6, Numeran 5, Redulosa 2