Red Bull Barako abante na sab, 3-2

Si Marquin Chandler mipabuto og 43 puntos alang sa Purefoods Chunkee Giants apan wala gihapon kini magsilbi sa opensa ni James Penny ug sa Red Bull Barako hinungdan nga napukan kini sa iskor nga 86-91 kagabii sa Game 5 sa ilang best-of-seven final series sa San Mig Coffee PBA Fiesta Conference didto sa Araneta Coliseum.

Ang Red Bull swerting nakasakay sa ngilngig usab nga opensa ni Penny kinsa mihipos og 31 puntos aron pagmartsa ngadto sa 3-2 nga bentaha sa serye batok sa Giants.

Tungod niini, ang Barako nagkinahanglan na lang og usa ka daog aron hingpit na gyud nilang makuha og taud-taod na usab nilang gipangandoy nga korona.

Matud pang coach Yeng Guiao paghuman sa duwa nga ilang buhaton ang tanan aron dili na makaginhawa ang Purefoods unya sa Domingo nga mao ang do-or-die nga Game 6 alang sa koponan ni coach Ryan Gregoria sa Giants.

Sa sinugdan init kaayong opensa ang gipakita sa Giants apan kalit lang kini nga nabugnaw sa ikaduhang kwarter og nakaposte ang Red Bull og labaw, 50-39 paghuman sa first half.

Ang Purefoods sa panguna ni Chandler inanay nga misikit pag-abot sa katapusang kwarter apan nahubsan gyud kini sa ilang kalibre hinungdan nga nakadistansya ang Red Bull ngadto na sa pagkulit sa kalampusan.