Freeman nangharos sa athletics, parlor games

Walay kurat nga gipakugangan sa The Freeman team ang ilang mga kaatbang dihang ilang gihurot og hakot ang mga medalyang bulawan sa katapusang adlaw sa gipahigayong Cebu City Mayor's Cup Trimedialympics kagahapon didto sa Cebu City Sports Center.

Impresibong labok ang gipakita sa Freeman team nga gipaluyuhan sa Jollibee Bogo ug Carcar human nila gisakmit og hurot ang 15 ka 15 gold medals.

Gawas niini, ang The Freeman team midominar usab sa parlor games ug malampuson usab nga gisakmit ang tanang tulo ka gold medals sa tulo ka event nga gilangkuban sa ball relay, egg relay ug tug-of-war.

Ang Freeman photographer nga si Iste Sesante-Leopoldo mihimo og ngilngig kaayong labok ug iyang nakuha ang gold medals human siya nanghawod sa shot put, discus throw ug javelin throw event.

Wala usab magpa-alkansi ang mga lalaki ug ila usab nga gidominar ang kompetisyon. Si Jigger Panganoron nanghawod sa shot put, si Franklin Llanos midominar sa discus throw ug si Andy Padigos midaog sa javelin throw.

Sa track and field, ang Freeman sports section assistant editor nga si Rafael Alas III impresibo usab nga midominar sa 50, 100 ug 200-meter run nga nakakuha usab og suporta sa iyang sports reporter nga si Caecent No-ot human kini midaog sa 50m. Si Emerald Quiapo midaog usab sa 100m ug ang Freeman community editor nga si Divine Sanchez-Ngujo miharos sa 200m.

Gidominar usab sa Freeman ang 8x50 ug 4x100 meter mixed relay ug 4x100m men's relay.

Mga milangkat usab ug laing mga medalya alang sa The Freeman team mao sila si Michael Medida ug Sesante-Leopoldo (silver-50m), Roel Labrador (bronze-100m), Cerna Jagonal (silver-100m), Janeth Montenegro (silver-200m), William Barneja ug Faith Maroto (bronze-shot put).

Samtang si Charlito Cañar (silver-discus throw), Maroto (bronze-discus throw), Franklin Llanos (silver-javelin throw) and advertising manager Tina Poblador (silver-javelin throw).

Ang SunStar Daily maoy nakakuha sa second overall.