Solo liderato naagaw ng Montaña

Nabawi muli ng Montaña ang liderato sa 2005 PBL Unity Cup, nang ilampaso nila ang inaalat na Magnolia Dairy Ice Cream, 61-76 sa pagpapatuloy ng 2005 PBL Unity Cup sa Pasig Sports Center.

Nagtulong sina Erick dela Cuesta at Jondan Salvador para sa Jewels nang kapwa sila magsubi ng 15 points upang ilista ang kanilang ikapitong panalo habang nalasap naman ng Wizards ang kanilang ikalimang kabiguan sa walong asignatura.

Ang panalo ng Jewels ay nagpatatag din sa kanilang kampanyang ma-kuha ang una sa dalawang awtomatikong puwesto sa semis.

Sa simula pa lamang ng laro ay lumayo na agad ang Jewels ng hanggang 13 puntos, 41-28 sa halftime.

At bagamat hindi nakalaro ang ace player nilang si Alex Compton, hindi nagpabaya ang mga kakamping sina Froilan Baguion, Reed Juntilla at Al Vergara.

Sa naunang laro, nagpakitang-gilas naman si MacMac Cardona ng banderahan nito ang Harbour Centre tungo sa 92-86 panalo laban sa Granny Goose Kornets. (Ulat ni Raquel Reyes)