Binasag ni Cantrell ang pagtatabla ng iskor sa 91-all nang pakawalan nito ang triple para sa final score, 12.8 segundo na lamang ang nalalabing oras sa laro.
Sinikap isalba ni Vergel Meneses ang FedEx nang magtangka ito ng tres sa huling posesyon ng Express ngunit pumaltos ito.
Agad namang nakuha ni Jimmy Alapag ang rebound upang maipre-serba ang panalo ng Phone Pals.
Ito ang ikalawang sunod na panalo ng Talk N Text na nag-angat sa kanila sa 2-1 record sa Group B, habang bumagsak naman ang FedEx sa 1-2 panalo-talo sa Group A.
Naantala ang laro ng 18 minuto dahil sa power interruption sa venue.
Natapos ang first game na walang aircon sa venue bago nagbalik ang power supply sa arena.
Isang 9-1 run ang pinagbidahan ni Yancy de Ocampo na umiskor ng anim na puntos upang iangat ang FedEx sa 88-85 ngunit sa tulong ni Cantrell na nagbida sa 6-0 run nakuha ng Phone Pals ang 91-89 trangko bago tumuntong sa huling dalawang minuto ng laro.
Umiskor naman si FedEx import Terrence Shannon ng basket upang itabla ang iskor sa 91-all,1:17 pa ang nasa orasan.
Habang sinusulat ang balitang ito, kasulukuyang naglalaban ang Ginebra at Red Bull sa main game.