Beermen pormal nang nakapasok sa quarterfinals

Nagsanib ng puwersa sina imports Art Long at Shea Seals partikular na sa ikaapat na quarter upang ibigay sa San Miguel Beer ang 84-72 panalo na nagpormalisa ng kanilang pagpasok sa quarterfinal round ng Samsung-PBA Commissioner’s Cup sa Cuneta Astrodome, kagabi.

Eksplosibong paglalaro ang ipinamalas ni Seals na tumapos ng 33 puntos bukod pa sa kanyang tiglimang assists para sa ikaapat na sunod na tagumpay ng Beermen, ikaanim sa kabuuang 9 na laro.

Naging mainit din si Long lalo na nang makabalik ito sa ikaapat na quarter, sanhi ng maagang pagkaka-foul sa ikatlong canto, sa kanyang tinapos na 22 puntos na lalong nagpahirap sa Talk ‘N Text.

Dahil dito, nalasap ng Phone Pals ang kanilang ikatlong sunod na kabiguan, ikalima sa 9 laro na naging dahilan ng kanilang pagkakatalsik sa kontensiyon sa twice-to-beat ticket na ipagka-kaloob sa top four teams.

Sa no-bearing na unang laro, ginulantang ng Purefoods TJ Hotdogs ang defending champion at league leader na Batang Red Bull sa pamamagitan ng impresibong 91-84 panalo.

Samantala, pagpopormalisa ng pagpasok sa quarterfinals ang layunin ng Sta. Lucia at Alaska sa kanilang magkahiwalay na asignatura ngayon sa pagpapatuloy ng aksiyon sa Araneta Coliseum.

Makakaharap ng Aces ang RP-Selecta na naghahabol sa susunod na round sa pambungad na laban sa ganap na alas-3:45 ng hapon, habang makakasagupa naman ng Realtors ang Shell Velocity sa dakong alas-5:45 ng hapon.

Nabalewala ang 28 produksiyon ni Jerald Honeycutt para sa Phone Pals. (Ulat ni Carmela V. Ochoa)