Kilalang personalidad sangkot sa World Grand Prix Women's Volleyball

Malalaking pangalan ng mga personalidad mula sa government ang itinalaga upang masiguro ang tagumpay ng Manila leg ngayong taong 10th World Grand Prix Wo-men’s Volleyball Championship na gaganapin sa Araneta Coliseum mula Hulyo 19-21.

Hinirang sina Senator Francis Pangilinan at Tourism Secretary Richard Gordon bilang Co-chairmen, habang sina Quezon City Mayor Feliciano Belmonte Jr., at Philippine Sports Commission Chairman Eric Buhain ay tatayong Co Vice-chairmen ng Organizing Committee ng nasabing event na lalahukan ng Sydney 2000 Olympics silver medalist Russia at bronze medalist Brazil, European Champion Germany at Asian powerhouse Japan.

Ang iba pang miyembro ng organizing committee ay sina PAGCOR chairman Efraim Genuino, PCSO chairperson Olivia de Leon, Philippine Amateur Volleyball Association (PAVA) Chairman Bro. Rolando Dizon, PAVA President Luis Gepuela, Photokina Marketing Corporation Executive Vice President George Chua, San Miguel Corporation Director for Corporate Affairs Ira Maniquis, Arian Works Management Corporation President Atty. Noli Eala at directors Conrad Banal at Ben Evardone.

Magbabalik ang World Grand Prix Women’s Volleyball Championship sa bansa makaraan ang dalawang taong pagliban at bahagi ng preparasyon ng four world rated women’s volleyball teams para sa Women’s World Championships ngayong Agosto.

Sisimulan ang preliminary rounds na sabay na iho-host ng Tokyo, Japan at Chengdu, China sa Huklyo 12-14. Ang finals ay lalahukan ng mga seeded team China at tatlong koponan na may maraming Grand Prix points makaraan ang preliminary rounds na idaraos sa Aug. 1-4 sa Hong Kong.

Ang iba pang sponsors ng event ay ang Philamlife, Godiva, Linkman at Alaska Milk, habang ang Philippine Star, 92.3 Joey’s Rhythm, DZAR Angel Radyo 1026 at Viva TV ang tri-media partners.

Ang apat na iba pang koponan na sasabak sa tatlong legs ay ang China, Cuba, Thailand at Amerika na siyang overall champion noong nakaraang taon.

Kabuuang $1.04 milyon ang nakataya sa apat na linggong event, dalawang legs kada weekend na mayroon ring iba pang preliminary rounds sa Nakhon Ratchasima, Thailand, Macau at Miau Li, Taiwan.